گلگت بلتستان انتخابات،پولنگ کاوقت شروع ہو چکا ووٹنگ شام پانچ بجے تک جاری رہے گی

گلگت (اُردو پوائنٹ اخبارتازہ ترین۔ 22 نومبر2020ء) حلقہ جی بی اے3گلگت3میں پولنگ آج ہورہی ہے۔پی ٹی آئی کے صوبائی صدرجعفرشاہ کے انتقال کی وجہ سے حلقے میں الیکشن ملتوی کیاگیاتھا۔گلگت بلتستان اسمبلی کے حلقہ جی بی اے 3 گلگت 3 اور جی بی اے 21 غذر 3 کے پولنگ اسٹیشن گندائے میں پولنگ شروع ہو چکی ہے۔ جی بی اے 3 گلگت 3 پر انتخابات پی ٹی آئی کے جعفر شاہ کے انتقال کے باعث ملتوی کردیے گئے تھے جہاں اب پولنگ ہو رہی ہے۔اس حلقے میں 22 ہزار 232 مرد اور 19 ہزار 42 خواتین ووٹر موجود ہیں۔دوسری جانب جی بی اے 21 غذر 3 کے پولنگ اسٹیشن گندائے میں 505 مرد اور403 خواتین کل اپنا حق رائے دہی استعمال کرسکیں گے۔15 نومبر کوپولنگ بکس شرپسند عناصر اٹھا کر لے گئے تھے جس کے باعث یہاں پولنگ روک دی گئی تھی۔

()

یاد رہے کہ گلگت بلتستان الیکشن میں تحریک انصاف واضح اکثریت حاصل کرنے میں ناکامی کے باوجود 9 نشستوں کیساتھ سب سے بڑی جماعت بن کر ابھری، جبکہ دوسرے نمبر پر آزاد امیدوار رہے، جنہوں نے 7 نشستوں پر فتح حاصل کی۔

انتخابات کے بعد 6 آزاد امیدوار تحریک انصاف میں شامل ہو چکے، جبکہ ایم ڈبلیو ایم بھی ایک نشست کیساتھ تحریک انصاف کی حمایت کرے گی۔ یوں تحریک انصاف کو حکومت بنانے کیلئے 16 نشستیں حاصل ہو چکیں۔ جبکہ تحریک انصاف کو امید ہے کہ جی بی اے 3 گلگت 3میں اس کی فتح ہوگی، جس کے بعد حکمراں جماعت کی کل نشستیں 10 ہو جائیں گی۔ یاد رہے گلگت بلتستان میں حکومت بنانے کیلئے 24 میں سے 13 نشستیں درکار ہوتی ہیں۔ اس حلقے میں تینوں پارٹیوں کے  امیدوار ایک  مرتبہ  پھر مقابلے کے لیے آمنے سامنے آ چکے ہیں۔  گلگت بلتستان میں حکومت تو پی ٹی آئی بنا چکی  ہے تاہم  دیکھنا یہ ہے کہ یہاں کے عوام حکومتی پارٹی کو ہی ووٹ دیتے ہیں یا پھر کسی اور امیدوار کا انتخاب کرتے ہیں۔پولنگ کا وقت شروع ہو چکا ہے جو کہ شام پانچ بجے تک جاری رہے گا۔