یہ نوازشریف کے خون کے پیاسے ہیں، اسی لیے وطن واپسی سے روکا، مریم نواز

لاہور(اردوپوائنٹ اخبار تازہ ترین۔ 23 نومبر2020ء) پاکستان مسلم لیگ ن کی مرکزی نائب صدر مریم نواز نے کہا ہے کہ یہ نوازشریف کے خون کے پیاسے ہیں، اسی لیے وطن واپسی سے روکا، میں کبھی نہِیں چاہوں گی کہ نوازشریف واپس آکر ان ظالموں کے ہاتھ میں اپنی زندگی دوبارہ دے دیں، دشمنوں کے ہاتھ میں اپنی زندگی کو دے دینا کہاں کی عقلمندی ہے، ابھی تو ان کو جیل میں نوازشریف کی زندگی کے ساتھ کھیلنے کا حساب دینا ہے۔ انہوں نے نجی ٹی وی سے گفتگو کرتے ہوئے کہا کہ حکومت کو پتہ تھا کہ موبائل فون سروسز بند ہیں اورانہیں خبر تھی کہ میری دادی فوت ہوچکی ہیں لیکن انہیں جلسے کے اسٹیج تک یہ خبر مجھ تک پہنچانے کی توفیق نہیں ہوئی۔ سیاست اپنی جگہ لیکن انسانیت بھی کوئی چیز ہوتی ہے۔ انہوں نے کہا کہ نوازشریف کو کسی صورت پاکستان واپس نہیں آنا چاہیے۔

()

کیونکہ یہ لوگ ان کے خون کے پیاسے ہیں۔

عمران خان اور نیب کی حراست میں ان کی زندگی کو جو سنگین خطرات لاحق ہوئے تھے ابھی اس کا حساب لینا باقی ہے۔ مریم نواز نے کہا کہ یہ لوگ بغض اورانتقام میں اندھے ہوچکے ہیں۔ میں کبھی نہِیں چاہوں گی کہ نوازشریف واپس آکر ان ظالموں کی تحویل میں اپنی زندگی دوبارہ دے دیں۔ جنہیں انتقام کے علاوہ کوئی چیز نظر نہیں آتی۔انہوں نے کہا کہ ہمیں سمن دیتے ہیں کہ عدالت میں پیش ہوں، نوازشریف تو اس وقت واپس آئے جب ان کی اہلیہ مرگ بستر پر پڑی تھیں، میاں نوازشریف اورمیں عدالت کی 200پیشیاں بھگتی ہیں،دنیا کو پتا چل چکا کہ نوازشریف نے مردانہ وار احتساب کا سامنا کیا۔ پھر وہ کیوں واپس آئیں اور کس کیس کیلئے آئیں ، اس کیس کیلئے جس میں ارشد ملک خود کہہ چکا کہ مجھے بلیک میل کرکے سزا دلوائی گئی، پھر ایسے انتقام کے سامنے کیوں آئیں؟ بالکل نہیں آنا چاہیے۔